I.Mičule – Lapa 6 – Latvijas pilskalni / Latvian hillforts

100 Latgales pilskalni. Reuta pilskalns

29.06.2018 No Comment

11.02.2018.g. Reuta. Divdesmit deveitais. Par Reuta pilskolnu informaceja vysai skūpa i vairuok, par laiku, kod tī Kamenecys muižnīks Mihails Reuts ītaisejs sovys saimis kapleicu. Tei nazy dieļ kam 2.pasauļa kara laikā sasprydzynuota. Pilskolns Skudreņu azara krostā i dūmojams apdzeivuots daudz seņuok par Reuta kunga vaļdeišonys laiku. Vītejais Jurs, kurs nu ituo kolna sovā laikā iz plēvis gobola braucs, stuosta, ka padūmju laikūs ap Reuta kolnu ir bejuse mototrase. Juos līceibys var atrast i tagad.

100 Latgales pilskalni. Upursalas pilskalns

29.06.2018 No Comment

11.02.2018.g. Upursolys. Divdesmit ostoitais. Pa Cireiša azara ladu nu Aglyunys vydsškolys pogolma da Upursolai ejam pavysam drūsi – bez viervu i vāzu. Jau pa gobolu redzīs solys laivu dastuošonys vīta i Latvejis vaļsts meži. Ka Latvejis valsts meži kur sovu rūku dalīk, tys labi, tik man nazkai ruodejuos, ka itū reizi ir drupeit par daudz. Drupeit par daudz dieļu aizgoldu, pi kuo dasaturēt, drupeit par daudz Aglyunys zvonu, drupeit par daudz tilteņu puori krytušajim kūkim. Taida jušona, ka Tevi stygys suokumā pajam zam rūkys i aizvad da gola. Par lobu skaistumam navā guojs ari nazkaids lokalais Aglyunys orkans, kas papūstejs solys mežu. Pretruneiga ari informaceja par pošu pilskolnu, skaidrs tik vīns – vīta ir bejuse intensivai apdzeivuota i izmontuota.

100 Latgales pilskalni. Rušenicas pilskalns

29.06.2018 No Comment

11.02.2018.g. Rušenicas. Divdesmit septeitais. Pa ceļam da Aglyunai, ībraucam apsavērt skaistū Rušenicys pilskolnu. Kai roksta Brasteņš, pilskolnā nikod nav bejs nikaidys saimnīciskuos darbeibys, dieļ tam kolns izaglobuojs cīši lobā stuovūklī. Jam taisneiba, reši kur var atrast tik izteiksmeigys pilskolna nūcītynuojumu i azsardzeibys formys. Kolns sakūpts, ar informacejis dieli, kuopnem, stuovvītom(2) i pilskolna nūsaukuma dieli kolna golā. Datryukst tik nūruožu nu ceļa.

100 Latgales pilskalni. Balbītes pilskalns

29.06.2018 No Comment

11.02.2018.g. Balbīte. Divdesmit sastais. Jau kaidu laiku gaidejom soltumu, lai varātu tikt iz lada, i itū reizi izsprīdem – tagad voi ar laivom! Itys braucīns velteits Latgolys solu pilskolnim. Suokam ar Balbīti – solu i pilskolnu Rāznys azarā, par kuru ziņu vysā moz. Sīnamēs pi viervis, jamam vāzys, salomojam bārnus i īmam. Iz lada jau palīkam drūsuoki, redzīs i pa kaidam mukšornīkam. Zivs azarā ir, vīna īzlāc poša bez vysaidys giušonys. Sola skaista, sakūpta i ar kinīšu čaja nameņu pošā kolna golā. Aizejam vēl i da sābru solai(ka tik tuoli aizguojuši), tik Ivara stuosteitūs akmiņu vītā(laikam apsnyguši), atrūnam īspaideigu vuornu koloneju solys kūkūs. I tagad pats golvonais – solu ar vysu pilskolnu var nūpierkt sevkurs, kam skanūšais voi čaukstūšais kuldā. 100 Latgolys pilskolnu akcionari apdūmoj vareibu sasasvīst i pajimt sev čaja nameņu!

100 Latgales pilskalni. Naujenes pilskalns

29.06.2018 No Comment

28.01.2018.g. Naujenes. Divdesmit pīktais. Vairok slavons kai Dinaburgys pils i Daugovpiļs piļsātys īsuokuma vīta. Atrūnamys i zinis nu senejuokim pilskolna laikim. Otkon ar nūruodem, stuovvītu, bārnu spieļu laukumu, kiosku i Eiropys leidzīņa kuopņu i platformu sistemu tikšonai da pilskolna. Kolnā apsaverami myura pils pamati i Dinaburgys pils makets, tik, pa munam, na tys golvonais. Golvonais – Daugova zam kuoju! Itū varātu nūsaukt par dzīdamū zīmys i snīga braucīni. Paļdis jaunajim – Dacei, Lidejai i Juram, taipat i visim pyrma jau radzātajim. Da cytai reizei!

100 Latgales pilskalni. Markovas pilskalns

29.06.2018 No Comment

28.01.2018.g. Markovas. Divdesmit caturtais. Itys ir vīns nu mozuokajim Latgolys pilskolnim i jam lūbīs, ka jis ir sūplok Slutiškom. Nazcik nūruožu no poša lelceļa, Eiropys leidzīņa stuovlaukums i sova styga. Tei gon nazi dieļ kuo nūsaukta par Mārkovys stygu. Sovā laikā plokonums lab tik daudz nūrokts, a vys jau kolns ar breineigim stuovumim i skotim.

100 Latgales pilskalni. Vecračinas pilskalns

29.06.2018 No Comment

28.01.2018.g. Vecračinas. Divdesmit trešais. Pyrmais nu Daugovys leikumu pilskolnim. Itys ir ar pasi i sovu velosipedistu trasi(oho repojam)! Pūsteits vairuok reižu – pyrma ar staraveru kopu īreikuošonu, tod ar myrušūs puorapbedeišonu 80-tajūs(beja planavuots, ka tī vyss byus zam iudiņa – Daugovpiļs HES). Nazkodejuo turisma infrastruktura pilskolnā tagad pavuorguse. Vysleidza, stuovumi da Daugovai i skoti – varoni.

100 Latgales pilskalni. Izvaltas pilskalns

29.06.2018 No Comment

28.01.2018.g. Izvoltys. Divdesmt ūtrais. Itys atrūnams jau daudz vīgļuok, tik vysleidza bez kaidu nūruožu. Breineigs skots nu kolna iz apleicīni, vīni suoni ar lelu stuovumu. Pilskolns cīši aizaudzs ar seikom atzolom. Bārni īmiegynoj jaunū snīgu i pilsolna suonus.

100 Latgales pilskalni. Murānu pilskalns

29.06.2018 No Comment

28.01.2018.g. Murānu. Divdesmit pyrmais. Pīktū ekspediceju suokam ar gryuši atrūnamū Murānu pilskolnu Kruoslovys nūvodā. Napalels ar jūkaini savārptom prīdem apaudzs. Plakuma vīns gols ar pacālumu, pilskolnam vīnūs suonūs akmiņu kruovums. Pilskolnā atrūnam akmini, Ivars dūmoj, ka jauns dūbeišu akmins Latgolā!!!

100 Latgales pilskalni. Belogrudovas pilskalns

07.01.2018 No Comment

07.01.2018.g. Belogrudovys(Egļu). Divdasmytais. Jau lobā timseņā braucam da divdasmytuo. Dziļi gruovi, slapni teirumi i snīgs. Pi kolna vēl palics nadaudz snīga i dieļ ituo Belogrudovys ir Kārļa meiluokais kolns. Bārni pykojās, raugam mudri sasastuot iz bildi i apīt kolnam apleik, kab vyss piec lykumim. Tymsā izkuopam iz nazcik akminim. Jezupa guņkurs, Alfrēda himna i vyss varātu jau beigtīs. A, nē, izaruoda, ka myus gaida Ambeļu kultūrys noma vadeituoja Ingrīda ar syltu čaju, torti i ekskurseju pa “Ambeļu skreini”. Lels paldis, Jai! Da nuokamai reizei i paldis visim. Hei!

100 Latgales pilskalni. Brīveru pilskalns

07.01.2018 No Comment

07.01.2018.g. Brīveru. Deveņpadsmytais. Ībraucam Aglyunys nūvodā, tik prūjom nu Dubnys vēl nateikam. Pilskolns skaistā vītā, stuovom molom, breineigu skotu iz upi i ryuceiša izgrauztu grovu. Meiluokais ituo braucīņa pilskolns gondreiž visim bārnim. Bebru paradīze, aizsprūsts pi aizsprūsta. Jī kuopuši stuovajā kolnā piec kūku i šļukuši atpakaļ. Pi poša pilskolna iz Dubnys vacys dziernovys ar aizsuoktim remontim.

100 Latgales pilskalni. Ļāperu pilskalns

07.01.2018 No Comment

07.01.2018.g. Ļāperu. Ostoņpadsmytais. Vēl vīns Dubnys pilskolns tik nalelu gabaleņu tuoļuok nu Grītys. Da itim obim nu ceļa beja taids gabaleņš juopaīt i bārnim napatyka. Apleik kolnam mozi pūreni i janvara dubli. Apaudzs ar mežu, klasiski skaists. Kolna molā atrūnam akmini, kas izaver piec cierva ar nūlauztu kuotu. Itamā braucīnī akmiņu atrodumu daudz i Ivars – laimeigs.

100 Latgales pilskalni. Greitas kalns

07.01.2018 No Comment

07.01.2018.g. Grītys. Muns jauneibys pilskolns, da kura nazkod īts vairuok reižu. Vīns nu skaistuokajim i leluokajim Dubnys pilskolnim. Ar īspaideigu valni, atrodumim, Dubnys stuovumu, kūkim, mylzu pyupiežim i golvonais – kolna saiminīku i saimineicu. Jī, izaruoda, verās leidza myusu braukšonai i sagaida myus pi kolna. Paldis jim par dorbu pilskolna sakuortuošonā, ekskurseju, stuostim i atbolstu. Lai vairuok itaidu cylvāku Latgolā i Latvejā! Nūsprīžam, ka Grītys kolnā varātu dzeivuot vasalu dīnu, i mudri laižam tuoļuok.

100 Latgales pilskalni. Lielās Baranaukas pilskalns

07.01.2018 No Comment

07.01.2018.g. Baranovskas. Pīcpadsmytais. Jā, jā pīcpadsmytais ūtrū reizi. Ite poruods nu īprīkšejuos reizis, kod naaizguojem da eistuo. Paldis Jūlijai Munčai, kura pastuosteja, kai atrast pareizū. Pareizais izaruodeja nūsaglobuojs aiz Galvānu HES pošā Dubnys krostā, kaidus 200 metrus nu naeistuo. Nalels, skaists, dīzgon aizaudzs, ar daudzom izrokumu pādom. Pādejuo pieteišona taiseita pyrms Galvānu HES rakšonys. Pilskolnu braucieju palīk vys vaira, itū reizi kluot ir Alfrēds, Juoņs, Jurs i Edvards. Heisā!!!

100 Latgales pilskalni. Dzirkaļu pilskalns

27.12.2017 No Comment

20.11.2017.g. Dzirkaļu. Mistiskuokais i ekspedicejis daleibnīku vysvairuok nūvārtātais pilskolns. Sakūpts ar pacaltu valsts karūgu meža vydā. Mikeļs kolnā izskrēje pyrmais, stuosteja, ka redziejs boltu zači i ilgi meklēje jū pa mežu. Staigojūt pa kolnu i jam apleik meklējem i mes – kurs boltu viersi, kurs mozu syvānu, kurs dagūšu plošku, kurs oluta vītu.

100 Latgales pilskalni. Ģedušu pilskalns

27.12.2017 No Comment

20.11.2017.g. Ģedušu (Gavartīnis). Ceļa molā, vīgli atrūnams, laikam dieļ tam i bez nūruodem. Spieceigā lūpkūpeibys ītekmis zonā, ar radzamim i saūžamim darbeibys blokusproduktim. Juosoka,ka vysu meikstynoj skaistī terasveida suoni, bārnu spieļu laukums kolnā i meikstuos mēbelis. Gonu i sorgu suni pīkluojeigi i draudzeigi.

100 Latgales pilskalni. Dzenes kalns

27.12.2017 No Comment

20.11.2017.g. Dzenes kolns. Vysmozuokais, vysgryutuok dasnīdzamais. Zamā, pūrainā vairuoku gruovu i upieļu satecis vītā, pavysam natuoli nu dzeļžaceļa. Bez vysaidu nūruožu, tik vīgli daīmams pa Dzeņu gruovi, kur Jureits pīsmēle zuoboku. Gruovam skaista, akmiņa myurāta caurtaka zam slīdem. Pilskolna plakums aizaudzs atzolom. Satiksme iz dzeļžaceļa intensiva, taisejom zekserus.

100 Latgales pilskalni. Jersikas pilskalns

27.12.2017 No Comment

20.11.2017.g. Jersikys. Nasaverūt iz visim breidynuojumim, saiminīks atsauceigs i saimineica čakla. Cīši draudzeigi kači, vīns taisejuos mums leidza. Traucēje industrialuos zonys tyvums i intensivuo saimnīciskuo darbeiba i juos palīkys pilskolnā i ap jū. Skaisti kūki i skots iz Daugovu. Spieceigi Daugovys vieji. Artefakti iz kotra sūļa!

100 Latgales pilskalni. Buivīšu pilskalns

27.12.2017 No Comment

10.12.2017.g. Buivīšu. Pilskolnā vaci katūļu kopi (nazkod bejuši), tagad taidi džungļi, ka vosorā navarātu īleist. Daudz apguoztu pīminekļu i krystu. Vīnā golā nazkod rokts, tagad tur rūk lopsys i izrūk golvys, kuojis i cytus kaulus. Pi pilskolna sabrukuse ferma i breineigs skots iz Daugovu! Eiropa da itai vītai vēl navā tykuse. Itū reizi žāl…

100 Latgales pilskalni. Svilišķu pilskalns

27.12.2017 No Comment

10.12.2017.g. Svilišķu. Leluokuo dale nu suonu nūorta, tik stuovuokajā golā nazcik kūku. Saiminīki kolnā tur pogrobu i pi kolna alni, kuru bārni var padzonuot. Ivars ar Jezupu atroda nazcik zeimeigu akmiņu, jī myusu pulceņam lels atspaids ar sovu zynuošonu i padūmu.

1 2 3 4 567

Page 6 of 7